Election Results: ఆంధ్రప్రదేశ్ పరిషత్ (జడ్పీటీసీ, ఎంపీటీసీ) ఎన్నికల ఫలితాల్లో పలు నియోజకవర్గాల్లో ఊహించని రీతిలో రికార్డు స్థాయి మెజార్టీలు నమోదవుతున్నాయి. హోరాహోరీగా సాగిన ఈ స్థానిక సంస్థల సమరంలో అధికార కూటమి అభ్యర్థులు ప్రత్యర్థులకు ఏమాత్రం అవకాశం ఇవ్వకుండా వేల ఓట్ల ఆధిక్యంతో జైత్రయాత్ర కొనసాగించారు. ముఖ్యంగా పల్నాడు జిల్లా క్రోసూరు జడ్పీటీసీ స్థానంలో జనసేన అభ్యర్థి సాధించిన విజయం రాష్ట్రవ్యాప్తంగా రాజకీయ వర్గాల్లో పెను సంచలనం సృష్టించింది.
రాష్ట్రంలోనే అత్యధిక మెజార్టీ: క్రోసూరులో జనసేన చారిత్రక విజయం!
పల్నాడు జిల్లా పెదకూరపాడు నియోజకవర్గం పరిధిలోని క్రోసూరు జడ్పీటీసీ స్థానం రాష్ట్రంలోనే అత్యధిక మెజార్టీ నమోదైన కేంద్రంగా నిలిచింది.
ఇక్కడ జనసేన పార్టీ అభ్యర్థిగా పోటీ చేసిన పమిడిపాటి శ్రీనివాసరావు ఏకంగా 30,273 ఓట్ల బంపర్ మెజార్టీతో విజయదుందుభి మోగించారు. క్రోసూరు మండలంలో పోలైన మొత్తం ఓట్లు సుమారు 38 వేలు కాగా, అందులో సింహభాగం ఓట్లను ఆయన ఒక్కరే దక్కించుకుని ప్రత్యర్థిని చిత్తు చేశారు. ఈ అపూర్వమైన రికార్డు విజయంతో జనసేన, కూటమి శ్రేణులు బాణాసంచా కాల్చి, స్వీట్లు పంచుకుంటూ సంబరాల్లో మునిగిపోయాయి.
మాచవరం, మైలవరంలో టీడీపీ క్లీన్‌స్వీప్..
పల్నాడు, ఎన్టీఆర్, ప్రకాశం జిల్లాల్లోనూ కూటమి అభ్యర్థులు భారీ మెజార్టీలతో ఘన విజయాలు అందుకున్నారు.
మాచవరం (పల్నాడు జిల్లా): మాచవరం మండలంలో కూటమి బలపరిచిన టీడీపీ జడ్పీటీసీ అభ్యర్థిని కత్తి సరోజిని తన సమీప ప్రత్యర్థి, వైసీపీ అభ్యర్థి దొండేటి వెంకాయమ్మపై ఏకంగా 22,882 ఓట్ల భారీ మెజార్టీతో అఖండ విజయం సాధించారు.
మైలవరం (ఎన్టీఆర్ జిల్లా): మైలవరం టీడీపీ జడ్పీటీసీ అభ్యర్థి పుత్త బ్రహ్మం ప్రత్యర్థిపై స్పష్టమైన ఆధిపత్యం ప్రదర్శిస్తూ 21,407 ఓట్ల మెజార్టీతో జయకేతనం ఎగురవేశారు.
గిద్దలూరు (ప్రకాశం జిల్లా): గిద్దలూరు మండల పరిధిలో టీడీపీ జడ్పీటీసీ అభ్యర్థిని చేరెడ్డి శ్రీలక్ష్మి ప్రత్యర్థిపై 12,616 ఓట్ల మెజార్టీతో ఘన విజయాన్ని తమ ఖాతాలో వేసుకున్నారు.
వేంపల్లిలో వైఎస్సార్‌సీపీ పట్టు..
వేంపల్లి (వైఎస్సార్ కడప జిల్లా): వేంపల్లి జడ్పీటీసీ స్థానం నుంచి బరిలో నిలిచిన వైసీపీ అభ్యర్థిని బత్తల వెంకట శివమ్మ ప్రత్యర్థిపై 19,203 ఓట్ల భారీ మెజార్టీతో గెలుపొంది తన స్థానాన్ని సురక్షితంగా నిలబెట్టుకున్నారు.
రాష్ట్రంలో నమోదైన ఈ భారీ మెజార్టీలు క్షేత్రస్థాయిలో ఓటర్ల నాడిని స్పష్టంగా ప్రతిబింబిస్తున్నాయి. ముఖ్యంగా పల్నాడు, ఎన్టీఆర్ జిల్లాల్లో కూటమి అభ్యర్థులు నమోదు చేసిన 20 వేల నుంచి 30 వేల స్థాయి మెజార్టీలు పల్లె పోరులో అధికార కూటమి ప్రభంజనాన్ని తేటతెల్లం చేస్తున్నాయి.